شكيكي لي وجع الضمير واشكيكي لي رب العباد
سهمآ طعنتيبو الفؤاد يرتد يرجع ليكي صاد
دربك مشيتو بلا دليل وقلبك وصلتو بلا ميعاد
سايقني شوق بت البلد الفيها ما يقبل مذاد
جيتك موشح بالامل كايس عليكي بلاد بلاد
شايل معاي حلم السنين وحاقب أماني اللقيا ذاد
دفقت تيراب الفرح ورويتو بي دم الفؤاد
وزربتو بي حبل الصبر وغذيتو دمع العين سماد
لحظة لقيتك قت خلاص يادوبو أنتم المراد
وكتبت ليك محظوظ انا وبقيت من الناس السعاد
وزعت كيمان الفرح للجنبي والناس البعاد
لكن لقيت مخدوع انا واحلامي أعلنت الحداد
كل البراءه الفيك وهم مكتوبه بي زيف المداد
ذي حية ناعمه مرقطة لكنو نايبا سام وحاد
لون زهره في شدرة عشر زول منها ابدآ ما استفاد
أديتك أحساسي الرهيف لقيتك احساسك جماد
كل ما أقرب من خطاك مشوار شقاي ألقاهو ذاد
وكل ما ألين واصبح حنين ألقاكي ذودتي العناد
من يوم عرفتك دابا عيني عرفت البكا والسهاد
كتلتي في نفسي الفرح عتمتي دنيتي بالسواد
ضيعتي محصول السنين وباقيلو مسرة علي الحصاد
مغروره صيادة فرص ملهوفه لي دوسة الزناد
لكني ماني البنهزم ويقبل شروط الاضطهاد
ومهما تكون نارك لظي باكر اكيد تصبح رماد
أنا ياني انا الصاين العهود والصاد محال يوم يبقي ضاد
وشن تسوي عاد سيخة خرز منضومه جم عقد الجلاد
ندمان علي اليوم العرفتك فيهو وكان كبوة جواد
ندمان علي كل لحظه فيها أديتك الحن والوداد
ندمان علي الزمن القضيتو معاكي رحال سندباد
ندمان علي الامل البنيتو عليك تبقي ام الولاد وبتضوقي يوم طعم الندم وتبقالك الاحزان مهاد
وشاكيكي لي رب العباد ونتلاقي في يوم الحساب