الشاعر حاتم حسن الدابي

لسان الحال
الكاتما فى جواى كتير متملك الجوف والعصب
وما كت دايرة أقولو ليك لكن لسان الحال غلـب
ما بنسى يـوم ودعتـنا وسافـرت فى غـرة رجـب
خليت وراك الدار حزين يتباكـا والدمع انسكـب
أعذرنى والله العظيم لو ما الضرورة أنا ما كتب
وأنا خايفة فى بعدك يكون الضاع هو ضعف المكتسب
اليومة داك ناس البلد هنونى شايقيى وعرب
قالو لى مبروك خير وجاك يكتب سلامتو الإغترب
قالو لى دوب نجم السعد طلاكى من بعد إحتجـب
يا دوبو بالك يستريح وتنسى العذابات والتعب..
فضّلت أحسب فى الشهور قاعدالى فوق نيران لهـب
صابرة وحريصة على الولاد لا بيقو للريح فى المهـب
سديت خانتك مــن مشيت قايمـابو واجبـى كأم وأب
والأسرة يضنيها المسير.. وتتهاوى لو ما فيها رب
والله ما بنـكر جميلك برضـو لينا ثناك وجب..
موكب هداياك ما انقطع.. كان سترة فى الزمـن الصعب
لابسين وماكلين والنعيم كايلنا فى يوم ما نضب..
وعايشين معيشـة المترفين.. طولنا والطبع إتخرب
البيت مفرش بالحرير ومليانة إيدى بالدهب..
لكن خسارة على محل.. عاش سيدو خمسة سنين عزب
الشى المهم ما قلتو ليك وليهو إنت ما ظنيت حسب
كبرو الصغيرونين خلاص.. خايفالم الطبع الكعب...
وصولوها مرحلة الخطر.. والأمن ما زال مستتب
وانا كتّ قادراهم زمان لكــن بعد كبرو اتغلب...
حصلنى قبل الجد يفوت.. دوبنهم فوق العتب
قبال نحصد الخير ندم.. ومابيجدى كان لمت وعتب
خايفالم الطيش فى الدروس.. ومابرضى لو واحد رسب
خوفنى المتعبنى الكبير بعدين يمرقو بلا أدب
وريتك الحاصل على لا فيهو ثورة ولا غضب...
شان الحديث مايبقى نى والواحة يكتنفا الجدب
أنا قلبى مازال لسة حى.. ونجمو الملاهج ماغرب
وآخر كلامى ترد على لا أبقة بكرة أنا السبب



مأساة من
الداخل
غناء/ خالد سفله
دايره الشورة يا أهل الشورة
محتارة وبقت مأساتي في جوايه ضاربه جذورة
اما انا لو سكت عليها تزداد كل يوم في طورة
ولو حاولت أقول وأحكيها أبكي من الكلام معبورة
الصبر الصبرتو عليها شال أيامي دين وجرورة
صادقة أنا ماني عارفه عايشه فصوله بره الصورة
كانت وأمي زي ما قالت والإباحة ضرورة
بعد أنا ما كبرت عرفت كشفت لي الرؤى المستورة
قالت لي أبوك فارقني وكت على فراقوا صبورة
في سنتي الوضعتك فيها ما تميت سبعة شهورة
ما ورتني سبب الفرقة قالت مافي ليهو ضرورة
عللت السبب بي القسمة والأ يام بتلعب دورة
إتربيت بين خلاني وأمي البي الزمن مهجورة
ماكله وقاريه أحمد ربي بتجيني أي حاجةادورة
بعد دار الزمان وكبرت لفتتني السنين ومرورة
قالت لي وينو ابوكي والحياة دون ابوك مبتورة
قلبت الاحاسيس في نبشت في دواخلي قبورة
لما بقيت اشوف الدنيا في لجة ظلام محصورة



كلمات للحبيب
كلمات: حاتم حسن الدابي
لاكنين فى العرف تنفع ولا الدموع فيها استفاده
ياحبيب كل شى قسمه واراده
فى الحروف يادمعه شفتك تعشق الداكن سوادا
وفى دروب عابره وكنين وجارى حفيان فوق وهادا
عامل الاحزان مطيتك شادو سرجك فوق جيادا
ده المخلى العيشه عندك صوره من عام الرماده
صح مبادى الريده عندك فى الصغر قويت عمادا
شلت نغمات قيس وعنتر فى كنينه الماضى عادا
كم سنين بى فوقنا فاتت وحتى ماعارفين عدادا
لى كنين فى الكير تفتش وانت فتها فى المخاده
لوصحيح كانت تبادلك ريدك الصار ليك عباده
رغم انها سامعه صرخات صوتك الفى جوفا نادا
ياكنين ريدك هلكنى واورث العين سهادا
على الاقل كانت تقولك ريدى بالاكتر زياده
سامعه كل القلتو فيها هاديه بعد انتم مرادا
عايشه فى خيره ونعيما وزاهيه فى حلل السعاده
وراهنه تنعم بى دلالا وبى رفيق دربا وبلادا
حليل خيوط احساسا بيك وين كتاياتا وودادا
كل ماجيت فوق ديارا نوخت ابلك قصادا
تبكى اطلال سيدا سافر بالسنين ماطال بعادا
لالقيت الغايبه منك لاالسنين لميت حصادا
ناسى والايام بتاكل فى عمرنا خيوت نجادا
يارفيق الدرب ارجع وخلص الروح من عنادا
ماتلين تكسر جموحك وشدو حيلك فى جهادا
زيدا من جرعات صمودك واليقين اليبقى ذادا
وحزر المثل البقولك موت عشان الحب زيادا
ابدا قبل العمر يكمل حصل انحل والندادا
ابتسم تبسم ورودك وافرش الافراح وسادا
صيده كان اصطادا غيرك مابيحللك اصطيادا
حكمه لو كان الف طائر منو اخير فىالكف جرادا