امونة / الشاعر عبدالرحمن الحسينابي

أمونة داركم وين طشينا من بابا
نسأل عليك الناس جلابا جلابا
عارفانى لا بنساك لا الغربة برضابا
كم مرة قلت اجيك القسمة غلابا
الشوق يسوقنى عليك الا القدر يابا
يا بت ملوك النيل كم ليكى نتشابا
العيد يمر بالناس ماطش مرابا
دايرك تكونى قريب وكت الزمن يابا
فى زحمة الايام تبقيلى هبابا
****
أصبحنا محكومين بى شرعة الغابة
أحلامنا فى المسرات راس مالا دبابة
نزرع يلموا العيش يدونا ورتابا
يا امونة داركم وين طشينا من بابا
بسأل عليك الناس جلابا جلابا
****
مليون طريد مرفود لا عض لاهوى
لا قدروا الاطفال لا راعوا للخوة
كان حصحصوا الاسباب يلقوه شن سوى
غير وطأة الاسعار فوق نارا يتلوى
حرب الجشع والمال اصبحنا اسلابا
ويا امونة داركم وين طشينا من بابا
****
يا امونة صمتك أخير شن ماش تقوليلو
مادام يشوف فى العيب يسكت عشان زولو
باكر يزيد اضعاف قبال يتم حولو
غلبك يشق الزول واقف على طولو
من خيرك المردوم تلحقنا بتابا
يا امونة داركم وين طشينا من بابا
****
تمساح فرقنا زمان شيخ قعدة الحانة
كان يهوى ست الدار تشجيهو الحانا
كلما يدق الباب تلقاها فرحانة
دارت بنا الايام سموه ملانا
يأمرنا بالاحسان وهو الفيها ما سابا
****
كلما انظلم حسان باكر تبين حواء
فى ظلمة النسيان صوتا شهر ضوى
بذر الحقد مدفون فى جوفة من جوة
بس صرخة المحتاج مابترهب القوة
تبقالقنا شاهد حق لليرضى واليابا
****
ما حواء برضو انسان مهموما بى حالا
لا بترحما الايام لا الفرحة كان فالا
كلما تمد الليد تلقى العدم كالا
رغم اليكون والكان منتظرى امالا
يا امونة داركم وين طشىنا من بابا
****
امالا لا ست بيت لا شقة مفروشة
لا موضة للسهرات لا حنة منقوشة
ابدا ولا فى البال يوم تبقى حنكوشة
امالا لقمة عيش لو تبقى فى الكوشة
ما حواء كوم احزان رحم الغضب جابا
****
تاهت فتاة اليوم واتلاشت البسمة
كلما يخونا حبيب يعزوه للقسمة
ناسين حديث الناس فى الهيئة والرسمة
ماتت فتاة اليوم يوم ماتت الحشمة
ويا امونة داركم وين طشينا من بابا
****
يا بت ملوك النيل يا أم جسما اسفنجى
ما اقبح المكياج فوق اصلك الزنجى
الناس ضمير واحساس ما لبس افرنجى
اشرف من التجار ود عز و مخزنجى
ويا امونة داركم وين طشينا من بابا
****
يا ليل خلاص مليت لون وشك الاسود
عنك سألت كتير عشمان الاقى الرد
لا وين معك ماشين لسه الطريق ممتد
صبر الغلابة الطال لا بد يدق فى الحد
وتظهر حقيقة الحال و ينكشفوا سبابا
ويا امونة داركم وين طشينا من بابا
بسأل عليك الناس جلابا جلابا